換 brake 油教學 (II)

egg_studio

之前寫過換 brake 油教學，由於人手關係，去到關鍵步驟唔夠手去影相，得文字紀錄，結果識換油嘅人就仍然識，唔識嘅就仍然唔識。

有見及此，近日同自己架車換油，影多幾張相，希望大家有個概念。

請先睇番 換 brake 油教學
我呢套係台製低階型號，用咗幾年，係時候換油。與版主果套唔同，呢套係用礦物油 (Mineral oil)。

準備物資：

• 礦物油 -- 響單車鋪有售，約一百有找。
• 六角匙、細號士巴拿或板手。
• 大針筒 -- 藥房或醫療器材鋪頭有售，約幾蚊雞。
  

Shimano 礦物油


內有礦物油一樽，另有一支膠喉。呢支油夠用兩次。



用膠喉連接 brake 及針筒，用士巴拿扭鬆 brake 上放油之嘩佬。




用六角匙打開油壺。




由於氣壓及重力關係，只要用針筒抽，brake 油就會抽到針筒內。抽時候要慢，並不時輕輕敲打 level 至 brake 之間嘅喉管，盡量令所有 brake 油被抽出。




Brake 油被抽出後，將新嘅 brake 油由針筒慢慢注入 brake 內。留意，brake 油從下向上泵，目的係防止氣泡積累響喉管內。 Brake 油被推向上，最後注入油壺。當油壺滿溢後，將 brake 上嘅嘩佬扭緊，拉動 level 幾下，然後盡量注滿油壺 (應該多到漏出嚟)。將油壺蓋裝好，抹去油積，就大功告成。

注意：
入山前一定要響安全及平坦路面試清楚 brake 嘅性能，因為若喉管內有空氣 / 氣泡，會發生突然冇 brake 嘅情況，十分危險，因此建議注入 brake 油時從下向上，唔好從油壺注入 (從上向下)。但有 d brake 型號因設計問題，唔可以咁做，咁要用另一種放氣嘅方法，或用機械抽真空，都幾麻煩，所以買 brake 時要留意一下。

另外，換 brake 油教學 內，版主果套 brake 用 DOT 油，而我呢套用礦物油。網上有唔少人爭論邊隻好，實際上我兩樣都有 (另一架 MT bike 用 DOT 油)，如果唔係 downhill 落幾公里路果種玩法，其實兩者性能差不多，反而係 brake 嘅設計影響仲大。

不過 -- 個人意見 -- DOT 油價錢平過礦物油幾十倍，因此，換 DOT 油基本上唔駛慳住用。由於換油時一定有少部分舊油依附響喉管內，除非用真空機，否則冇可能 100% 抽晒出嚟。用 DOT 油的話，可以不斷咁 pump 油入去 "清洗" 喉管，成本都係幾蚊，但用礦物油的話，"油價" 貴過買套新 brake。