〔轉〕海黃捉面的餐蛋麵 vs 大塊活下午茶餐…

Homan

注意：產品內容及定價只供參考，一切以商號公告為準！

咦？不是快餐火鍋GP系列連載中嗎？節目調動？無錯，火鍋了幾個星期，有點悶，火鍋GP附加賽程壓後，首先推出特別篇！

波塞東粥店旗下灣仔分店(好像還是地庫部份?)限定推出的33元特厚餐肉蛋麵，叫價33元，海報一出，在網上瘋傳，網民議論紛紛，「快餐冒險」作為香港BLOG壇中最新最快最公正的快餐資訊，點可以唔親身上陣？會一會哩碗傳說中的餐蛋麵？同場加映，決戰兩大集團下午茶餐蛋系列！

---

首先登場，係定價33元的「厚切餐蛋麵」，之前網頁出現了笑點「五餐肉」，網頁改正了，但店內海報仍然是「五餐肉」，其實呢，以佢個厚度，在某些刀工精湛(誤)的大集團手，真的可切成五片餐肉......
。

睇睇個麵先，餐肉的確唔嘢少，目測有大集團餐肉二至三倍或以上厚度，而且「圓塊」上，唔打得都睇得，可惜味道係普通料，質感較糊，厚切後口感沒有改善，同之前介紹「太兄」個餐肉完全無得比，蛋算大隻，蛋白的確算多，但味道普通，一丁大家知咩事，從略，最正，係條菜，確係鮮甜，但最唔掂， 得兩條，幅相都有三條啦......

豆漿算大杯，值番幾蚊，成個餐肯定係唔抵，但去超市睇睇餐肉幾錢罐後，就會發現未算好過份，不過，個麵本身設計麻麻，如薄切一半減價或原價減量但提升餐肉質量可能更討好，最緊要加多幾條菜，應該會受歡迎好多。同埋，最好唔好用「只售」哩類字眼.......

---

三連擊！之後到大塊活的下午茶，因為大塊活午市餐肉蛋飯，本家過去曾兩度中招，已被列入黑名單，今次挑戰下午茶，咦？大塊活極少數得到快餐冒險讚賞的產品「陳皮紅豆沙」竟然重出江湖？搭配迷你餐蛋麵同雞翼一共24蚊都幾ok，就佢啦！

個麵煮都唔煮就咁一嚿麵餅加湯，重要發都唔發開，簡直係快餐既極致，餐蛋麵個蛋出乎意料幾靚，餐肉在本家多次吐糟後，這次看起來還合理，不過質素依然麻麻，哩個餐肉麵屬搭單貨級數，但以大塊活來講，品質已經算係咁了.....

雞翼ok，夠大隻，肉質唔會梅，有交代！個「陳皮紅豆沙」雖然不如之前出色，陳皮香大大減少，雖然仍屬水準之作，大大拉高平均分，24蚊，都幾滿意，但唔關餐肉蛋麵事。

---

最後，大加落參一腳，下午茶新品「細碗餐蛋飯」，連熱飲只要21元，再加幾蚊可以多碗魚肉湯，價格還ok。

好坦白地細碗真係相當細，煎蛋大隻又靚靚地，重幾好味，比波塞東果隻咩咩蛋重好味。飯上面有豉油，點都唔會哽唔落，餐肉有兩片，但薄到夾起都有困難，大風可能有機會吹走，真係要好好珍惜。味道亦欠佳，冇咩餐肉香，冇質又冇量，失敗。

加幾蚊碗魚肉湯都ok多魚肉，但肉味欠奉，幸好，紫菜都叫多，只係餐蛋飯正常人應該食唔飽，加埋哩碗就勉勉強強ok了。

原文：http://shadowzo.mysinablog.com/i ... p;articleId=3248777

神秘人

餐蛋麵梗系去大排檔啦

Homan

神秘人 發表於 30-6-2012 12:59 PM
餐蛋麵梗系去大排檔啦

可惜大排檔越來越少呢…