恐怖壽司 -- 粉嶺爭鮮外帶壽司 -- 不是食評

egg_studio

個零月前響粉嶺火車站開咗間壽司鋪，淨做外賣，特色係乜嘢壽司都係 $3 件。

先君子後小人，呢個唔係食評，所以冇相 (而且聽我講完都未必想睇)，不過我聽日會響鋪頭外影番張相 show 俾大家。

唔係食評，咁係乜呢？響日本大地震 + 漏輻射後，輸港日本食材大減，而今日已經有某 d 縣嘅食物被禁輸港。當然，心水清或者真係出過街食過好嘢嘅都知，響香港，果 d 十零廿蚊碟嘅迴轉壽司或者百零二百蚊一位嘅日式放題又點會俾日本新鮮食材你？所以，當有日本食肆 or 壽司鋪標明空運新鮮乜乜乜就應該係老點你，或者真係空運又新鮮，不過響大陸或馬來西亞運來 -- 三文魚就 90% 都係挪威養魚；鰻魚就算日本本土都係來自福建；八爪魚、尤魚等就本地；吞拿魚、立魚等就周圍都有 (以上資料由某食材批發商提供)，所以冇得一千幾百一位，冇乜可能可以真係食到日本空運。

尋日響爭鮮外帶壽司門口見到一個牌，大概意思係本店嘅食材早前已大量入貨，因此依家賣緊嘅係存貨，冇受到輻射污染，而本店亦已經響全球不同供應商入貨，所以顧客可以放心食用 (大約係咁嘅意思)。

睇完之後仲驚 -- 我從來冇幫趁過，所以唔知 d 壽司有幾好食，但言下之意係雖然標榜新鮮，但其實 d 貨兩個禮拜前入定，我屋企雪櫃 d 餸都唔會雪兩個禮拜啦。

更恐怖係......每日行過總見到鋪頭迫滿人，大家響度搶壽司，而鋪頭冇夾提供，所以顧客就用手逐件壽司㩒吓"鍊"吓，啱先放入盒 (因為壽司係逐件計錢，鋪頭俾個膠盒你自己執)，仲有 d 人放埋個鼻度聞幾聞先決定買唔買。

所以，假如你係草根或窮鬼，應該發憤努力讀書 / 工作，賺多 d 錢行遠幾步食 d 好嘢，唔好貪 d 小便宜 $3 壽司，或者，寧願餓死都唔好食人地 d 鼻毛或者唔知去完廁所有冇洗手嘅手"鍊"過嘅 $3 壽司。

Homan

  我十年八載前常常吃＄3一件的壽司…

Kendall_One

買果d壽司.......我寧願買個菠蘿包或者雞尾包好過。

hongdonald

仲差過明將SOSAD..
其實呢D 壽司只係觀塘/荃灣某D工廠大廈搵機整既MASS PRODUCTION 產品..

alexphoto

咁marketplace同吉之島的壽司又食唔食得? Sogo每日收鋪前都有特價壽司買, 有d都係4,5元左右, 我食過幾次都冇事。(掂下木先)

egg_studio

呢架唔係壽司嘅問題，我一早申報咗我未幫趁過呢間嘢，所以好唔好食我唔知，而講嘅係佢冇供應夾之類嘅工具，所以顧客要用手去攞，仲有 d 顧客為咗了解吓新唔新鮮，用手指㩒或者用鼻聞。呢個現象其實店鋪及顧客都有責任。

另一樣係，自從日本地震後，呢 d 平價日式食肆紛紛同日本劃清界線，講得直 d ，呢 d 平價日式食肆露晒底，被逼承認食材其實根本唔係日本嚟。

之前都講過，以三文魚為例，野生嘅點會係橙色？你睇吓紀錄片，黑熊響條河捉果 d 三文係唔係橙色？日式食肆 d 食材唔係日本嚟其實大部分人都知，只係大家未必有深研唔係日本嚟會響邊度嚟？

上面我有提過某食材批發商，香港其實只有幾間日式食材批發商，大家下次食日本嘢時可以留意吓。

egg_studio

補相