找回密碼
 登記成會員
搜索
查看: 16469|回復: 17

[賽後報告] 毅行者2015後記 + 19 條shortcut大公開

[複製鏈接]
發表於 30-11-2015 23:59:23 | 顯示全部樓層 |閱讀模式

登記成為會員,看更多精采內容!

您需要 登錄 才可以下載或查看,沒有賬號?登記成會員

×
本帖最後由 神秘人 於 30-11-2015 11:59 PM 編輯

又系一年一鑊毅行者!今屆除左我神秘人既s隊,頌有大笪地出2隊,嘩,真系熱鬧到要放煙花!Shortcut小王子旦兄頌會做我十卜,同我分亨賽道上、shortcut上同十卜上既開心野,開心到唔x知點x樣講好,而且旦兄打中文一向超快所以決定由佢打字甘我做小好多野大家又快d 有得睇!

egg_studio 及神秘人首次 crossover 從 supporter 角度從另一個角度睇毅行者,十足幪面超人 crossover 戰隊一樣咁x 精彩。

以下文章以對話形式記錄,由 egg_studio 打字。







「今年參加嘅有三隊,其中兩隊係由行過幾屆嘅大笪地會員組成,其餘一隊就係自 2013 果屆起,多咗好多人認識,又令不少人想起佢底嘅神秘人兄。」

「我出咗位,都係因為 2013 年出咗個毅行2013及18條shortcut大公開!,清楚指出毅行 18 條 shortcut 嘅位置,令好多人了解點解有啲隊伍可以咁快,極受網友歡迎,只要響 Google 打「毅行shortcut」,第一個甫士(注:post)就係!不少毅行者雖然口口聲聲話唔行 shortcut,不過都會偷偷下載一份用嚟睇門口。」

「咁又唔好咁講,因為好多 S 隊及一般參加者的確冇行 shortcut;不過講開又講,樂施會總唔會響各大 shortcut 前放啲工作人員,閘一閘入 shortcut 嘅人。」

「梗係啦,當中有啲商業因素,我地玩開 S(注:S 隊)就略知一二……」

「呢啲爆大鑊嘢我地等陣「一路行一路講」!」

「好!咁我繼續趁今次機會介紹吓自己!我係神秘人,除咗橫掃股壇外,跑山都係強項!參加過幾屆毅行,每年人腳不同,最慢一年貼近 30 個鐘,最快試過 15 個鐘,上年就 16 左右啦!」

「乜嘢叫 16 左右?」

「自從 2013 年出咗毅行2013及18條shortcut大公開!後,真係有人好有心機翻查毅行成績,檢查咁多隊 S 隊,想查出我係乜水,而且響 S 界入面,特別係有商業贊助果啲職業隊,對於行 shortcut 特別敏感,為免影響人地飯碗,所以我講嘅 16 只係「咁上下」,可以係 15,又可以係 17,總之保持神秘,你信則有,不信得條毛。」

「總之,神兄就係我識嘅人之中,除第一屆外,年年都係 S 隊嘅朋友,亦係我嘅目標。」

「旦兄你想玩 S 隊的話,冇問題!樂施會規定,三個 S 人就可以搭一件蛋散,只要旦兄你出晒抽獎費及捐款,我地一定受你玩!」

「咁正!但我未必有體力追得到你地。」

「冇問題,只要你去到 CP2(注:北潭坳)俾我地放爆,我地就會剪你帶。雖然你完成唔到,但話晒都叫做曾經享受過過程。不過,我地為善最樂,所以你若體力唔夠,但又想完成攞 cert,只要捐多啲錢,我地會提供「神秘換人服務」,派出我地神秘部隊後備隊員,響你爆偈時同你換帶,然後專車送你去另一個 checkpoint,等你回復體力後,又換番你上陣!」

「咁……條手帶點算?」

「條帶一啪就開啦!而且,我地有最新款 Canon MG7770 Pixma 雲端打印機,當你響報到時啪上手帶一刻,我地會有人幫你 scan 手帶,另一邊,神秘部隊已經打印出另一條手帶……」

「呢個下年再諗諗……我地講咁耐,都未開始講今屆。今年 2015,我有幸幫神兄做 support,了解吓 S 隊除咗行 shortcut 外,響步速及體力嘅分配。」

「齋靠 shortcut 當然冇用,最多咪快個零鐘。要快,一定要靠天資及後天努力。」

「識神兄咁耐,最正經就係呢句。」

「不過話分兩頭,今年同旦兄現場所見,加上又有 S 隊前輩爆料,又發現新 shortcut!」

「冇錯,真係要「一路行一路講」咯!」

「好!入正題啦!朝早搞好晒啲繁文縟節後(注:登記、影入冊相、簽生死狀等等),就快快做熱身。我地玩開跑山,一般熱身都要做番超過一個鐘先落得場。」

「要咁耐㗎?我地一般人開步前只係係咁咦拉吓筋,大部分時間係影相及打卡。」

「不只毅行,所有比賽活動,賽前拉筋同熱身都好 Q 重要,絕對不能輕視!」

「又學咗嘢。今次,掹神兄車邊,同 S 隊一齊起步。起步前,有一隊主動走過嚟。起初我以為要找神兄悔氣,話晒你都爆晒18 條 shortcut俾全世界知,點知佢地搵神兄係討論第 19 條 shortcut 戰略。」

「冇錯,因為佢地「研究」出另一條非常賤格嘅路線,就係……」

「等等!好嘢留番陣間講。」

「不過都先爆少少先……呢隊友仔專登唔着隊衫,唔係因為冇錢做衫,而係為咗第 19 號 shortcut;四條友着到唔同樣,成個普通人咁。」

「好哇,開步啦。由於我另外 support 果兩隊(注:大笪地隊)響 12:30pm 先起步,所以我就跟神兄跑頭兩段,去到北潭坳走人,沾吓 S 隊嘅光都好丫。」

「以旦兄過去做到 21 小時嘅體力,應該可以跟我地全力「奶」到去水浪窩先爆偈,不過佢話要 support 另外兩隊,所以會響北潭坳走先,擺明係藉口!」

「廢話少講!我跟你地跑到東壩,先發現原來你地唔係想像中咁快!從起點至東壩,用咗 1hr08mins。之前我紀錄都係 1hr15mins, 原來唔係慢你地好多。」

「我地唔係要開飯(注:職業隊),所以戰略上頭段會放慢,留力俾後段,唐詩有云「早着先機抖一抖,膽色過人神秘人,養精蓄銳急步走,後段扯旗人過人」!」

「乜有呢首唐詩嘅咩?」

「呢一刻開始就有嗱!意思係,將體力留響後面幾段平路,例如梅子林至基維爾、獅子山至畢架山、8 號同 11 號 shortcut、大帽山波波至終點,總之前段要留力。」

「過東壩後,本來取道穿山甲徑(第 1 號 shortcut),但神兄話唔好入!點解有 shortcut 都唔行?」

「因為擔心封村事件重演,所以呢兩年 S 界前輩冇人將穿山甲徑「翻新」,所以為免賺頭蝕尾, 大家決定今年唔搏穿山甲徑。」

「就係因為咁搞到我要一口氣跑上西灣山,之後一口氣落西灣士多,先有機會抖一抖。」

「去到西灣士多係大約 10 點半。一去到,就見到我啲 friend 響度飲奶茶!」

「飲緊奶茶、欣賞嘅海景嘅,就係響起點同神兄研究第 19 號 shortcut 果隊 S 隊。佢地好悠閑咁一早到咗西灣士多飲奶茶!」

「呢四件蛋散就係用新開發嘅第 19 號 shortcut!啟發佢地嘅係果年嘅「封村事件」。」

「第 19 號 shortcut 其實好簡單,就係響起點直接經西灣亭去西灣士多。但起步後約一公里,往西灣亭果個路口咁多人又有工作人員,呢四位前輩點樣響眾目睽睽下貢入去呢?」

「呢四件蛋散!起步後,當大家滾水渌腳咁跑走晒後,四件蛋散分開四個人,公然響工作人員及警察前自稱行山人士或 support,施施然行入西灣亭!當我地去到東壩時,四件蛋散已經響西灣士多食完餐旦麵,叫埋奶茶飲!」

「所以,佢地冇隊衫,反而着住時下流行嘅行山風褸遮住手帶,加埋一部播緊粵劇嘅 MP3 機(連喇叭),成副晨運 look,邊會有人估到佢地係上屆用 15 個鐘收工嘅 S 隊!」

Screen Shot 2015-11-23 at 10.03.37 pm.png
樂施會網站內以 Google Map 指出 2015 年活動路線之截圖
 樓主| 發表於 2-12-2015 01:03:49 | 顯示全部樓層
Homan 發表於 1-12-2015 12:46 PM
神兄,如果要保護,請告訴我你的姓名、聯絡方法及地址⋯

聯絡地址:999郵箱(999九個兇手競猜游戲收)

 樓主| 發表於 30-11-2015 23:59:24 | 顯示全部樓層
「呢四個人太過份,竟然唔叫埋我一齊行!人多的話,一齊搭綠 van 入去仲開心呀!」

「不過盜亦有道,幾位前輩都等埋我地先嘟手帶,之後我地兩隊人,昂然闊步邁向西灣海灘!」

「四件蛋散邊有咁好心!佢地老早就盤算過,若咁早嘟手帶的話,一定會惹人起疑,事關年年都會有啲好 Q 得閒嘅人上網 check 人地成績及時間,特別係樹大招風嘅 S 隊,所以,呢班老鬼玩得好小心,絕對唔會留低蛛絲馬跡!」

「咁去到西灣海灘,當然會預計全部人,包括成日話自己唔會行 shortcut 嘅衛道之士,一齊行海灘。」

「冇錯,我 -- 神秘人 -- 突然想做吓衛道之士,所謂「人做我偏唔做」,於是突然決定唔行 shortcut!而同行幾位老鬼可能認為頭先 short 得太過份,又飲埋奶茶,於是對我肅然起敬,咁一行 9 件(注:唔好忘記旦兄),往左走,行正路!」

「當我地 9 個人行到近直升機場時,有兩位大會工作人員,叫我地行落海灘。我奇怪,明明樂施會因為之前有人為咗行 shortcut 攪到打大交,仲上埋報紙,而樂施會亦明文指出,行沙灘係 shortcut(注:上圖為樂施會網站內,以 Google Map 指出 2015 年活動路線之截圖),點解工作人員會叫我地落沙灘呢?於是,我就同工作人員講……」

「等等,要補充,當時旦兄係「粗詞鹽「能」」咁同工作人員講……」

「係「措辭嚴謹」。」

「係,Sony Sony(注:sorry sorry)……旦兄措辭嚴謹咁同工作人員講:「你地未聽過「企硬、short 嘢、衰硬!」嗎?點 X 知兩位工作人員堅持要我地 short 嘢(落沙灘),而且後面嘅參加者紛紛向我地投下鄙視嘅目光,鄙視完我地後,就匆匆走落海灘 short 嘢。」

「我行咁多年毅行,行過咁多 shortcut,已經贏得「Shortcut 小王子」嘅美譽,今日竟然因為唔行 shortcut 而俾人鄙視,真係道德淪亡。」

「可能同佔中事件或者區議會選舉有關!」

「邊關事!應該又係商業因素作祟……一陣先爆大鑊!」

「咁……既然民主無罪,造反有理,紅衛兵扮黃雨傘,咁我地只好跟大隊落沙灘 short 嘢……真係諗起都好唔開心。之後,我地只好化悲憤為力量,以比 training 快少少嘅速度上 CP2(北潭坳)。去到 CP2,時間大約係 11 點半左右。」

「我就響呢度(CP2)同神兄及一齊行嘅前輩老鬼隊講 bye bye,因為我要 support 大笪地另外兩隊,要趕車返去北潭涌。經過呢廿零公里,我體會到要做到好時間嘅秘訣,其實好簡單,就係訓練嘅強度要夠。好多人,包括我地呢啲永遠徘徊響 20 小時頭嘅,好多時只係着重「儲里數」,忽略每次訓練嘅強度。跟神兄一齊上路,你地速度唔會好快,但無論上斜落斜都 keep 住差唔多速度。另外,兩隊 S 隊一共 8 個人,大家步速完全唔同,有啲人上斜快,有啲落斜快,有啲平路影都冇,但大家唔會專登減慢或加速嚟就番隊友,大家只專注自己 pacing,去到 checkpoint 先等齊一隊。」

「冇錯,千祈唔好為咗「要四個人一齊跑」呢啲無聊信念而強迫自己改變速度。響長距離運動,pacing 好重要,一定要掌握。」

「我地平時玩時,前後都有無數隊伍,今次感受到前後都冇人嘅孤獨感覺;去到 checkpoint,又係得小貓幾隻,工作人員係參加者閒閒地十倍,非當荒涼。同神兄道別後,我就響北潭坳搭車走,神兄就繼續上路。」

「冇咗旦兄,我地少一個負累!(egg_studio 按:頂你!)之後沿途冇乜特別,年年都差唔多……去到雞公頂,見到一隊 S 全隊四件一齊點煙,大口大口咁索。」

「咦,你地冇行第 6 號 shortcut 落榕樹澳嗎?」

「冇,因為去到路口時,有十幾個應該係某隊「話明唔 short 嘢嘅 S 隊(西灣海灘除外)」嘅 support team 駐咗響度,仲有人揸住相機, 虎視眈眈咁影低從山上落嚟嘅人。我地唔知佢地意圖,所以立刻同老鬼隊以眼神及眉毛傳話,決定走原路上雞公,以策安全。」

「而我就啱啱好趕到返起點,送走大笪地兩 team 人。呢兩 team 可謂舊人帶新人。佢地 12:30pm 出發,大約用咗兩個鐘去東壩,然後個零鐘去到西灣士多(CP1)。本來好地地,想繼續行去鹽田買汽水(第 3 號 shortcut),點知因為水漲,令佢地行唔到海灘去鹽田!結果要行繞山邊嘅正路,好無奈!之後又冇乜特別,正如神兄所講,年年都差唔多。去到 CP2 時就快日落,之後跟住一條火龍上山,大約 9 點隊員陸續抵達水浪窩(CP3)。」

「聽你咁講,又真係年年都差唔多,再咁落去,下年你肯寫後記都冇人睇!」

「本來以為係咁,不過總會有新鮮事……嗱,有隊員話我知,佢響 checkpoint 對出嘅巴士站見到……」

「見到乜?又見到 Rosemary 嗎?」(注:請爬舊文)

 樓主| 發表於 30-11-2015 23:59:25 | 顯示全部樓層
「非也!響往沙田方向嘅巴士上,有一隊毅行者落車!」

「咁賤格!?純潔無瑕嘅我,縱使行咁多 shortcut,都從未諗過搭車呢個概念!」

「我諗,有兩個可能性,第一,佢地響北潭坳(CP2)嘟帶後,上 94 號,然後轉任何一輛往沙田嘅巴士,就可以響水浪窩落車!第二個可能性,係搭 94 先去西貢腳底按摩,然後食完晚飯,再搭巴士返水浪窩!」

「太賤格啦!」

「咁又唔好咁講,可能人地冇 support team,又食唔慣 checkpoint 啲生冷嘢,所以被逼要出西貢食飯,人地要蝕時間㗎!」

「你咁講,我唯有接受啦。不過我就唔會搭巴士,係我就包定架的士啦!咁之後佢地點呢?」

「咪施施然行入去嘟帶囉!」

「咁佢地有冇嘟完帶行番出嚟搭巴士去基維爾呢?」

「咁我又唔知,因為目睹事發嘅隊員今年有心有力,話要 28 小時以內收工,所以佢地嘟帶後就匆匆上路,冇跟蹤人地!講開呢兩隊大笪地 team,位位都雄心勃勃,若有睇過我好多年前寫嘅後記(毅行者 2008 回憶錄),當中有隊員今年以前輩身分帶領後輩出戰。呢位前輩最慢紀錄係 28(注:28 小時),之後 24、23、22、21 咁進步,而其他隊員都好 fit,所以今年兩 team 人都以 28 以內做目標,我覺得唔係問題。」

「聽完你咁講,令我勃勃起來,若然大家再努力,要突破 20,易過借火!」

「不過,呢兩年抽唔到,所以大家都停留咗響 21 小時。」

「咁今年又抽中兩隊?」

「據行內人爆料,過去一兩年香港多咗好多行山跑山比賽,呢啲比賽除咗報名費平,又唔駛捐咁多錢,最重要係計分!所以吸引咗好多職業運動員去參加。有得多職業運動員,水平自然高,咁又吸引咗更多業餘玩家過檔。相反,毅行就堅持唔係比賽,參加費又貴 -- 雖然話部分係做善事,但幾年前爆出將善款捐去反高鐵組織,又有因為行 shortcut 打大交事件,最重要係 -- 唔計分!所以報名人數大減,「中獎」機會自然大增 -- 我地都抽到兩隊!」

「計分有鬼用,你話有得用嚟換百佳現金券就有用啫!」

「好多人覺得好有用㗎,你睇「北面」果啲比賽,幾分鐘就爆滿!Action Asia 果啲就更加不在話下!此外,我又從某啲渠道得知,呢一兩年本來有幾位職業運動員唔會參加毅行,原因係簽咗呢啲運動員嘅運動品牌唔放人,想旗下運動員專注番自己搞嘅比賽。」

「咁結果點呢?」

「當中來來回回傾咗幾輪,結果部分職業運動員玩番毅行,有啲就以其他隊名參加,有啲冇出現。Trade off 係,大會因為冇咗好多跑得快嘅職業運動員,為咗 keep 住有「亮麗」成績,所以仍然縱容行 shortcut 呢啲行為!」

「Short 嘢背後原來有咁多黑幕,係我地呢啲唔識咁多商業運作嘅人想像不到!咁多口一問,解放軍係咪因為受職業運動員同埋運動品牌嘅壓力而唔參加呢?」

「呢啲去到國家機密層面我知都唔講啦!不過,又據我從某啲渠道得知,幾年前有一個法籍退役軍人,應該係輸唔起,走去玩投訴,話解放軍係「不屬於人民的軍隊」,而且佢地接受嘅係 full time 軍事操練,咁對其他人唔公平喎,所以唔准人參加。最後大會有冇理佢就唔知,而呢條友後來都冇報過毅行。不過,果陣正正係大會高調將毅行者「走出去」同埋引入更多運動品牌嘅時期,timing 啱啱好,所以解放軍唔玩,可能有跡可尋!」

「咁賤格都有!?」

「再賤格啲都仲有!後來有人估,呢條法籍退役軍人 L 究竟收咗邊瓣嘅錢?係邊個國家響背後搞搞震?抑或純粹係商業世界嘅手段?」

「咁聽落,又似係商業嘢多啲喎。假如嘢嘢都輸俾軍人,仲鬼有職業隊玩咩!例如英國毅行,唔通又會俾愛爾蘭共和軍派隊玩咩!?始終,毅行都好 X 商業㗎!」

「總之有唔對路,就去中國領事館求助啦!好啦,要講番正題!今年大笪地兩 team,除咗雄心勃勃,仲朝氣勃勃。當我響水浪窩迎接大笪地隊時,發覺前輩隊員跑得好快,比第二位快差唔多 15 分鐘,同最後到達嘅隊員相差咗接近一小時。咁,我同最後到達果位隊員講,你若唔快啲,做唔到 30 㗎喎。但佢話:「冇所謂!因為第一次參加,完成就好開心!」突然間,我耳邊有人同我講:「既然今年由你做 support,要搵啲嘢搞搞佢。」」

「搞邊個?」

「唔係搞人,係搞吓新意思,否則下年真係冇人睇我地啲後記㗎!」

「當旦兄後來講番搞乜春後,我立刻肅然起敬!響揭開謎底前,我要分享吓我神秘人隊另一個致勝秘訣,就係 checkpoint 停不超過 5 分鐘!大家都知,毅行有好 Q 多個 checkpoint,好多人唔知點解,凡一到 checkpoint 一定要停一停,好似上世欠落佢咁。我地為咗做好時間,每個 checkpoint 指定動作係:嘟帶、攞嘢食、加水、撇!嘢食一路行一路食,所以若冇入 pit,一般唔會停留多過 5 分鐘!你地計一計,若你上世欠落佢,每個 checkpoint 都要打卡、覆 message、又有成班 support team 同你影相;有啲 support team 可能係你畢業後都冇見過嘅同學,甚至你隊友嘅屋企人,對方為咗支持你,無端端走去山卡啦 support 屋企人個 friend,分分鐘冇見過面!到時又要電話聯絡位置,好彩霸到路邊位,5 分鐘就搵到對方,唔好彩就要紥響 checkpoint 以外 5 分鐘路程。之後,相認後又要自我介紹,如果佢係伯母的話,又要等佢講晒佢個仔(即係你隊友)呢幾個月嚟為咗練毅行嘅付出,一下唔好彩就講三個字(注:15 分鐘),之後要等埋唔識路果位姨媽嚟埋先,因為姨媽煲咗湯俾你地成 team 飲,驚等陣上山「聶」親(注:着涼)。結果,冇一個鐘都走唔出伯母及姨媽嘅手指罅。計一計,一個 checkpoint 玩你半個鐘,10 個 checkpoint 就玩你 5 個鐘。」

「冇錯,有啲人,10 個都未夠,去到東壩、獅子亭、城水 BBQ 都要停一停。」

「所以,若果 checkpoint 停得少,時間自然會快幾個鐘!我做到廿幾頭果幾年,秘訣就係唔駛人做 support,乜都食大會,只係安排兩個位(注:位置)換衫及鞋。」

「為咗令新隊員明白呢個道理,旦兄披上猙獰嘅惡魔面具,甘願受世人嘅指責,盤算咗一個計劃:拖延隊員停 checkpoint 嘅時間,令大家突破 30 小時!」

「呢啲係「活動教學」嘅一種 -- 先令大家將停 checkpoint 嘅害處深深烙印響心底深處,咁大家下年就會更容易突破 20 小時!」

「旦兄果然普渡慈航,為咗隊友嘅將來,要陪佢地磨足 30 幾個鐘,簡直係神派嚟救贖小羔羊嘅使者!」

「響水浪窩,先係將食物分階段攞出嚟。先係外表吸引、有幾種口味嘅壽司,要逐盒逐盒開,以免大家食得太快。期間請隊友分享頭 20 公里無聊八卦事,之後影相,用完我部相機,又用隊友相機,總之一個甫士影幾輪。壽司食晒就攞烚薯仔出嚟。烚薯仔係大家最愛,因為不單提供熱量,可以響 checkpoint 即刻食又得,帶走一路行一路食又得。為咗令薯仔又好味又易入口,烚時加入大量海鹽……」

「粗鹽就粗鹽啦,X!」

「依家邊有人講粗鹽㗎!?係人都叫海鹽㗎!我果包連海鹽都冇寫,叫做「海之晶」!食完大家都「晶」神晒,雄心勃勃地走上馬鞍山!之後兩 team 人就展開最長嘅一段,有成 16 公里,差唔多要 5、6 個鐘,當中又係年年都差唔多。」

「冇錯,年年都差唔多。我地 S 隊最早起步,一般嚟到呢段,條路係前冇古人,後冇追兵,比 training 時仲少人,如果冇怪獸出現,真係冇嘢好講。」

「所以,就等我講吓做 support 嘅經驗,等大家知道隊員響度「年年都差唔多」時,我地究竟會做啲乜。」

「我估,返屋企訓覺!?」

「住得近就係,但我地唔同神兄你地,可以食大會嘢兼唔停 checkpoint。我地呢啲公子哥兒,食得生冷啲都話要血債血償,所以當響水浪窩送走佢地後,立刻落九龍城買新鮮生滾碎牛粥!」

「正喎!係本地牛肉定急凍肥牛?」

「梗係要本地牛肉啦!粥入面一定加埋「海之晶」!米方面,要選用上等「水磨冰晶米」,咁煲出嚟嘅粥,先入得呢幾位大爺口。」

「乜 Q 係「水磨冰晶米」?」

 樓主| 發表於 30-11-2015 23:59:26 | 顯示全部樓層
本帖最後由 神秘人 於 2-12-2015 01:01 AM 編輯

「用水喉水洗乾淨啲最 cheap 嘅日本水晶米用嚟煲粥,咪叫「水磨冰晶米」!之後就揸車上沙田坳。」

「去到呢度,啱啱一半路程。我地就響呢度換衫褲鞋襪,特別係鞋!過咗 M100,之後大部分以石屎路為主打,所以我地會拿拿臨換番對「石屎之王」!」

「係喎,經你一講,M100 之後除咗獅子山至畢架山一段、鉛礦坳上大帽山,同埋最後環塘路外,其餘都係以石屎路為主。」

「冇錯!所以,要快,記得換「石屎之王」!講番「水磨冰晶米」先……就算生米煮成粥,都唔駛咁早上沙田坳卦。」

「我地買完粥食埋消夜,都只係 12 點幾,果陣兩 team 人只係去到梅子林。不過,我地都早好多上定沙田坳,一來要搵定車位,二來我地又諗到新意思:做一個統計!」

「乜嘢統計咁 X 巴閉?」


「就係響著名 shortcut -- 可稱為「King of Shortcut」嘅「狗汪徑」出口駐紮(第 7 號 shortcut),做咗一個非官方嘅統計,計算有幾多隊毅行會響「狗汪徑」行出嚟!」

「嘩,呢啲好 X 敏感!如果公開咗,樂施會唔知又會點面對?若果以後禁止 short 嘢,咁啲職業隊就冇飯開,而且可能好多隊伍會俾人 DQ(注:取消資格)!萬一有人乘機搞多次佔中,我地咪成為千古罪人!?」

「唔會!第一,依家台灣同美國都接近大選,佢地唔得閒響香港搞多次佔中;等二,shortcut 存在咁多年,每年都有唔少隊伍響西灣沙灘及鹽田沙灘影相 post 上網,有晒隊號有晒嘜頭,樂施會都當睇唔到;第三,今年響西灣沙灘真係有工作人員叫人行 shortcut;第四,如果樂施會揸正嚟做,每屆你估吓有幾多隊要被 DQ?當中有幾多職業隊?會唔會變成另一場公關大災難?」

「旦兄,得你舉一反三,我放心晒。咁,請你將咁有學術價值嘅統計結果公開俾愚弟見識見識!」

「當晚我同 support team 響半夜 1 點半至 5 點半,一共 4 個鐘,泊好車,坐定定,set 好相機,記錄分別響正路同埋 shortcut 行出嚟嘅隊伍。嗱,我地一定要見到號碼牌先當係……」

「好彩我早就過咗,否則一定俾你地影埋相!」

「結果係,響四個鐘內,一共有 132 隊見到號碼牌嘅隊伍通過,其中 27 隊響「狗汪徑」行出嚟!包括大笪地兩隊!」

「我利申先,我同埋老鬼隊就絕對有 short 嘢!我地一出「狗汪徑」,就梗係一支箭咁「標」落山,乜都睇唔到睇唔到睇唔到……不過,我想知,其他響「King of Shortcut」行出嚟嘅友仔有乜表情?」

「好多嘢,未試過親歷其境你都估佢唔到!大部分人反應係 DUP 低頭,鬼鬼崇崇咁走咗去;有啲施施然咁響你前面行過,完全當睇你唔到;又有人煞有介事咁講:「啱啱去完廁所啦!」,笑笑口咁走人;又有人同我地講:「加油!」,加乜鬼呀,睇我地個樣就知做 support 啦;之後又有人周圍問人:「邊條路去沙田坳呢?」、「咦,好似行錯路喎?」、「我退出咗㗎啦!」一睇就知老手,響度扮無知……真係人生百態乜都有!」

「太賤格啦!」

「當我地做統計做到咁上下,見到大笪地隊響「狗汪徑」行出嚟,咁我梗係上前迎接,點知佢地都係 DUP 低頭扮睇我唔到睇我唔到睇我唔到……我叫佢地都唔應,又叫埋隊號出嚟又唔應,最後要拍佢膊頭先肯望你半眼!」

「真係世風日下,道德淪亡!可知我神秘人咁多年嚟都係光明正大行 shortcut ,原來咁多人又要威又要戴頭盔!」

「統計之餘,我地都要 support 隊友。佢地食完生滾碎牛粥後,為咗確保大家可以從 2X 個鐘突破去 3X 個鐘,我地騰出成架 support 車,叫大家入去休息一陣。當日半夜三更寒風凜凜,食完碎牛粥,又有汽水飲,咁牛肉入面嘅蛋白質轉化成氨基酸後,同汽水嘅二氧化碳產生化學作用,會令人昏昏欲睡,加上架車暖笠笠,咁就一覺訓到大天光。」

「原來牛肉唔溝得可樂?唔怪得人地話早餐唔好飲汽水啦!以前讀書時,「能廚」食麥當勞若果食巨無霸飲可樂,下晝堂就實訓着!若果食魚柳包果日就鬼打都冇咁精神,原來當中大有學問!」

「起身果陣,晨光初現,大家訓醒晒,有隊員直情唔記得係行緊毅行,以為要返工!總之,新的一天,新的開始。」

「有得訓真係好!我同老鬼隊 keep 住平路跑、落斜跑、上斜快步……去到畢架山後,就左轉入第 8 號 shortcut。兩年前,我響呢度對住九龍全景「殊殊」,然後大叫「pk梁振英下台」!」

「呢句咁經典當然有不少人記得,咁今年神兄你又哎咗乜呢?」

「自習近平上台,梁振英冇得連任就係鉛一般嘅事實;我一路「殊殊」一路諗,之前政改事件,泛民唔想通過,係唔係因為佢擔心萬一通過咗,泛民自己點都要推件豬頭嘜出嚟選呢?好彩就選唔到,但一下行衰運 -- 選到!咪即係接咗個炸彈,真係臨老入花叢,惹到生花柳!」

「咁可能建制派都睇得到呢個奧妙,所以連票都唔投!」

「唉,邊個咁 x 笨會接呢枝火棒?所以,我今年「殊殊」後,諗到一個下屆特首嘅適合人選,佢又夠年青、又可以用完即棄、路線又騎呢 -- 泛民以為佢係泛民、建制以為佢建制 -- 最緊要係佢夠蠢,連「槍打出頭鳥」呢個道理都唔識!」

 樓主| 發表於 1-12-2015 11:12:29 | 顯示全部樓層
本帖最後由 神秘人 於 2-12-2015 01:04 AM 編輯

「香港政壇原來有咁嘅奇人?我真係估唔到!」

「有!所以,我當日……就大哎:「支持田北俊做特首!」。」

「我又認為習主席會唔 Nike (like) 佢喎!」

「我都唔 Nike 啦,不過所謂「用人唯才」,所以「臨渴要掘井」!相信今日嘅習主席應該明白呢個道理。而泛民、建制及果啲得閒就偏左又偏右嘅政黨應該知道「孔融讓梨」,即係自己唔鍾意食嘅嘢當然要讓俾人,咁先環保嘛!」

「神兄果然見解獨到,其實不如由神兄參選,我一定投你一票。」

「咪搞!啱啱先講完「槍打出頭鳥」,愚弟轉頭點會選特首呢!不如講番毅行!」

「頭先講到邊度?頭先掛住講廢話,啲讀者都唔記得啦!」

「講到大笪地隊啱啱起身!然後你送佢地起頭。」

「咁我就去麥當勞食早餐,順手買八份早餐全餐去城門水塘。」

「早餐全餐?唔怕油「利」咩?」

「又唔係我行(毅行)!而且早晨全餐營養較大會 checkpoint 餐均勻!之前班友仔,響 CP6(走私坳)已經食完烏冬!」

「係喎,今年響走私坳有烏冬食。食完行多幾步又有早晨全餐。飲飽食醉後,最好避免做劇烈運動。」

「所以,離開城水後,隊友就行「大 shortcut」!」

「乜第 11 號 shortcut 已經改咗名做「大 shortcut」?」

「自從神兄你公開咗毅行 18 條 shortcut後,跑山界入面最多人討論嘅就係呢條!原因係,呢條 shortcut 其實係本地另一個跑山活動「苗圃」嘅 shortcut!每一年,「苗圃」比賽中,去到城門水塘裏面 checkpoint 時(正名:SS4 登記站),總會見到唔少人響前面行番入嚟「給」印仔(注:「苗圃」以蓋印證明經過檢查站)。仲有一年,因為城門水塘裏面山泥傾瀉,大會改道,將 shortcut 變成官方路線,令到更多人認識!」

「所謂臨急抱佛腳,好多玩毅行嘅人,都會以「苗圃」作最後備戰,所以,我敢肯定,玩開「苗圃」嘅,一定識窿路!」

「呢條 shortcut 連接城水至鉛礦坳,如果照睇地圖,望落去距離上好似冇 so,但由於係一條緩緩上斜嘅寬闊石屎路,唔似原路咁要上完針草後落番嚟,唔會蝕海拔,所以點都有着數!」

「2013 年果屆,我同另一隊 S 隊一齊行;今年就同老鬼隊一齊。我地上到鉛礦坳,比行正路慳咗一個鐘大約,仲有時間嘆番個麵!」

「咁又係無驚無險咁去到大帽山。」

「冇錯,一樣係「年年都差唔多」。」

「再咁落去,下年後記一定冇人睇。」

「但,聽講旦兄你今年最後都忍唔住要落場跑番轉?」

「係,因為 support 完大帽山(CP8)呢站後,啲時間又唔上唔落,而隊友又已經行咗 80 公里,響佢地崩潰前,係時候推一推佢地。從戰術層面睇,最後兩段以落山為主,主要上斜有兩個山……」

「兩個?乜唔係得最後水塘上大棠一個山咩?」

「神兄,古語有云「何不食肉糜」?你體力無限就梗係唔知世間事啦,我地平日踩開越野單車就最身同感受!因為響荃錦坳起,並非一直落山,實際係要上斜去一個我地單車人叫「田夫仔北」嘅地方(注:依家已經有個巨型神主牌響度,詳情請另看開山掘路系列 -- 仲有 Sportsoho Podcast 節目!),果度高度係 567 米,比荃錦坳高出大約 80 米,之後先係落斜!」


IMAG5339.jpg
過咗呢個「神主牌」,先係落斜嘅開始!

「我仲一直以為的係平路㖭!」

「好多人都有呢個誤會!雖然戰略上最後兩段應該係跑 -- 因為好多隊伍可以響最後兩段追番幾個鐘時間!但要跑,都要響過咗「田夫仔北」先放盡!」

「咁大笪地兩隊響最後兩段表現成點?」

「兩 team 人響荃錦坳休息後,因為已經達成突破 30 呢個紀錄,所以係時候鼓勵大家跑一跑!其中一隊隊員比較擅長跑石屎路,所以兩隊響到達吉慶橋(CP9)時有大約 15 分鐘差距。我作為陪跑員,責任就係帶慢少少第一隊,同時以電話了解第二隊位置,繼而鼓勵佢地快啲追上嚟。響環塘路段完結時,兩隊相距已縮窄至 10 分鐘。再去到大棠馬路時,已經得番 5 分鐘!結果,兩隊響入度假營前匯合,最後八條友一齊衝線!」

「嘩,好 X 感動,竟然等埋一齊衝線!呢啲先係真正嘅團體精神!比官腔乜 Q 「四件蛋散八隻腳一條心」有意義得多!諗番我同老鬼隊,越近終點,我地就由朋友變世仇,響最後兩段各不相讓,我鬆踭佢起飛腿,差啲又響終點開大片!相比起你地呢啲純真嘅友誼,我地真係無地自容!旦兄,愚弟自覺有愧天下!我以後會等埋冇行 shortcut 嘅隊伍先衝線啦!」

「不如下屆比賽,神兄你學吓某 S 隊,除咗響大帽山畫箭咀外,仲響 18 條 shortcut 棟牌,令大家唔會 miss。」

「好提議!咁做不單惠澤社群,直情係普渡慈航!愚弟下年一定咁做,請大家都多多支持!」

「咁,今届嘅後記又去到尾聲,讀者無論鍾唔鍾意,或者有冇 short 嘢,都俾個 Like 啦!」

「仲有,仰慕我神秘人既讀者,繼續響成績表推算我係邊個之餘,請繼續支持每一屆嘅參加者,因為無論佢地有幾蛋散、有幾 short 嘢、有冇打交,大家都做咗善事,普渡慈航咗呀!」

發表於 1-12-2015 11:19:16 | 顯示全部樓層
神秘人兄,你一出 post 一晚幾個鐘就錄得超過 2000 個瀏覽,比你兩年前果 post 勁得多!小心俾人找悔氣呀!

Screen Shot 2015-12-01 at 11.15.23 am.png

發表於 1-12-2015 12:46:55 | 顯示全部樓層
神兄,如果要保護,請告訴我你的姓名、聯絡方法及地址⋯
發表於 1-12-2015 14:12:59 來自手機 | 顯示全部樓層
佢直頭可以搵解放軍保護。
發表於 1-12-2015 23:33:38 | 顯示全部樓層
在facebook 都有一些人回應覺得行 shortcut 「玩黎有乜意義?」
你又點睇呢?

我個人就覺得,既然呢個係慈善行山活動,行快點慢點多點少點都係自己嘅,同別人快慢長短無關⋯ 自己開心就OK啦⋯
反向咁諗,唔通有人會嫌唔抵要行來回,如果篇文教你行毅行時不妨上埋蚺蛇、上埋馬鞍頂、草山標距柱⋯ 咩!

就算係,你都吹佢唔脹架,人地鐘意行多D都係人地嘅事啦

發表於 1-12-2015 23:47:48 來自手機 | 顯示全部樓層
我平時玩比賽,無論行山、單車比賽,包括上文引述過嘅苗圃,都從未走shortcut,唯獨毅行一定會行,原因係毅行唔係比賽(樂施會都重申過好多次:毅行不是比賽,係活動 -- 大家除響樂施會網站搵到外,可以到Sportsoho聽節目,聽吓毅行活動總監嘅講法)。

毅行,只係一個有計時嘅百萬行。

衛道之士嘅說話我聽得多,但點解佢地仍然響西灣行海灘?上 Google  打「毅行2015西灣海灘」,會搵到有位有心人將響西灣行 shortcut 嘅參加者嘅相公開響 Facebook ,樂施會又唔會會取消佢地資格呢?

我都睇過好多人寫後記,有啲人會用「比賽」、「賽事」呢啲字眼,我諗佢地唔係太清楚自己參加緊乜。
 樓主| 發表於 2-12-2015 01:08:30 | 顯示全部樓層
egg_studio 發表於 1-12-2015 11:19 AM
神秘人兄,你一出 post 一晚幾個鐘就錄得超過 2000 個瀏覽,比你兩年前果 post 勁得多!小心俾人找悔氣呀! ...

我甘大公獻,可5可升我做探險版會員等我弟到神秘地方?

評分

參與人數 1積分 +40 收起 理由
Homan + 40 精品文章

查看全部評分

發表於 4-12-2015 12:52:39 | 顯示全部樓層
神秘人 發表於 2-12-2015 01:08 AM
我甘大公獻,可5可升我做探險版會員等我弟到神秘地方?

好啦
我支持你

發表於 14-8-2016 14:06:42 | 顯示全部樓層
因為呢篇文章,主辦機構終於要「正視」shortcut 問題了!

大家估估今年成績會提升 or 下降?不要忽略,文中除爆黑幕外,亦有好多正面訊息,例如做好時間嘅秘訣及描寫真正嘅團結精神!

http://hk.on.cc/hk/bkn/cnt/news/ ... 0813_00822_001.html

 樓主| 發表於 14-8-2016 14:43:56 | 顯示全部樓層
乜原來我篇野成為google no.1,一打毅行shortcut就排頭位

樂屍會終於做野!好野!神秘人好野!打字同做十卜既旦兄好野!!
發表於 16-8-2016 15:17:37 | 顯示全部樓層
求教,文中"豬頭嘜"喺暗示邊位??
發表於 21-8-2016 09:05:49 來自手機 | 顯示全部樓層
好野…! 咁長盡!
 樓主| 發表於 5-10-2016 13:28:27 | 顯示全部樓層

我神秘人唔好野仲有邊個夠膽話好野

您需要登錄後才可以回帖 登錄 | 登記成會員

本版積分規則

聯絡|手機版|香港大笪地

GMT+8, 15-7-2024 08:13 PM

Powered by Discuz! X3.5

Copyright © 2001-2024 Tencent Cloud.

快速回復 返回頂部 返回列表