上星期「重新」（仲有減磅！）接近廢鐵 condition 越野單車，今個星期會翻新 Cannodale R400 鋼管公路車。

據網上資料，R400 於 1993 年發售，配全套 Shimano 105 七速。

前車主踩咗一段時間後，將戰車泊響室內停車場，經過唔知幾多年，落入現役車主手上。

先過磅，重 22 磅。睇睇單車乜嘢情況：


Cannodale R400



鍊嚴重生銹，可以棄掉。波腳情況未知，要拆咗條鍊先知。



前餅睇落應該 OK，只需要翻新。



波撥 -- 睇相就知 -- 醫番嘥藥費。



Brake level 好奇怪，點解會走埋一面？



鵝頸都生銹。Headset 轉動暢順，應該唔駛換。



座位 -- 同最高領導架車一樣，坐上去隨時生 XX 及 YY ！



車呔嚴重硬化。車鈴雖然尚算名牌，不過重量不能接受，考慮成條換。



Hubs 不暢順 -- 雖然翻新珠盤唔複雜，不過亦如上面所講，考慮換過新嘅。



105 brake -- 我自己有一套 8 成新，可以捐俾車主。


由於現役車主唔係鬥車車手，所以打算用平頭。我初部建議用蝴蝶頭（請參考訂造復古鋼管車架 -- 團購完成！），有型得嚟又大方，而且踩長途會舒服啲。

請留意連載！

看樓主呢期興玩舊車翻新, 我有架阿皮羅外買車, 要唔要攞去玩?

攞去做 magic cone 啦。

油尖旺區某單車鋪執粒，平買了 Cinelli 鵝頸。

此外，有善心人捐出 Shimano RS10 轆一對連飛輪，不過 RS10 主調黑色，沒有「復古」味道，所以同現役車主商議後，不配蝴蝶頭，改為平把，即將 R400 改於為平把公路車。

日前完成翻新 R400。看圖看故事：


拆開 headset，原裝雪油仍在，condition 十分好，明顯上手車主冇將單車放響露天，所以縱使 headset 外部及鵝頸生銹，但裏面情況良好。所以，清潔後裝回。




拆走嚴重生銹鍊後，檢查波腳情況，除「轆仔」有少少蝕（形成有虛位）外，操作正常，所以用打磨膏處理及加雪油後，回復七成光彩。

善長捐出 Shimano RS10 車轆及中價 Shimano 飛輪，重量減低少許，但轉動比原本車轆順暢。



BB 情況良好，所以清潔及加番雪油後重用，唔駛買過新。

前餅有少少「咬」，但影響不大。又係用磨膏處理後，回復七成光彩。



原裝波撥生銹嚴重，拆出嚟後證實冇得救，所以買番新款 105 波撥。

鍊同樣用 105 鍊，夠 cheap。




頭尾 brake 由善長捐出倉底 105 brake 夾，年份及顏色同原裝完全一樣，但 condition 天淵之別。



座位由現役車主提供，而 seat 通都經清潔，回復七成光彩。



接上 post -- 本來響執粒單車鋪買得 Cinelli 鵝頸，不過螺絲母有問題，所以暫時用番原裝生銹鵝頸先。

Handle bar 響某單車鋪（唔係執粒果間）搵到一支幾十年前嘅倉底貨，電鍍、形狀靚、價錢平，本來襯絕Cinelli 鵝頸……

Brake level 搵唔到又平又係電鍍（響 Velo Orange 有幾款電鍍 C 夾 brake level，不過 out budget），所以平買 SRAM 平把 brake level。

最後，R400 重生！

之後去試車。

上面一直專登冇提嘅一件事，大家有冇留意呢？就係飛輪已由七速「升級」至十速，但轉波仍然用「傳統」嘅「雪條棍」！

用過 Shimano 「雪條棍」嘅車手，應該記得右邊可以選擇用「index」或「無段」。由於由七速變成十速，不可以用「index」，至於用「無段」會唔會好難轉波轉得準？試車後，發現由於飛輪厚度一樣，但由七層變十層，所以間距變少，轉波時好難會轉唔準。而且，「雪條棍」嘅優勢係，可以一下轉十個波，而前餅轉波速度亦比用「槍手」快。

用「雪條棍」一下轉十個波 -- 雖然缺點係轉波時要單手踩，不過真係好快。

鵝頸修理完成，依家車頭簡潔又瀟灑。